الرئيسية / هتجوز / نصائح مهمة في اختيار شقتك قبل الجواز

نصائح مهمة في اختيار شقتك قبل الجواز

كلنا عارفين أن الجواز خطوة مهمة لأي شخص بيدور على الاستقرار. وأول حاجة بيفكر فيها الشخص المقبل على الجواز هي الشقة. كل واحد بيسأل نفسه في الأول ” اشتري شقة فين ويا ترى أشتريها مساحتها قد ايه؟” قرار انك تشتري شقة الجواز قرار محير ومش سهل  لأنك لازم تحط في حساباتك أن الشقة دي مش بس لازم تكون مناسبة ليك؛ لازم تكون مناسبة لأولادك كمان في المستقبل. ومن أهم الحاجات اللي لازم تحطها في بالك وانت بتجيب الشقة: موقعها والمرافق والخدمات اللي موجودة حواليها. وطبعا لازم تكون في الآخر مناسبة لميزانيتك وإمكانياتك. هندردش مع بعض ونتكلم في شوية حاجات أساسية لازم تحطها في بالك وانت بتشتري شقة. أهم وأول حاجة لازم تفكر فيها:

  1. نوع   الوحدة السكنية التي هتسكن فيها:

في أنواع كتير من الوحدات السكنية اللي بتكون مختلفة عن بعضها في المميزات والخصائص زي:

الشقق السكنية: ودي عبارة عن وحدات سكنية في عمارة وبيكون فيها عدد معين من الغرف والحمامات.

الدوبلكس: ودي نوع من أنواع  الشقق السكنية بس بتكون عبارة عن دورين  فوق بعض و متصلة بسلم داخلي.

البنتهاوس: ده نوع تالت من أنواع الشقق السكنية وبيكون دايمًا الدور الأخير في العمارة ومعاه مساحة من الروف.

التاون هاوس: ودي بتكون فلل متصلة بجنينة صغيرة وبتكون جنب بعض في صف واحد.

التوين هاوس: ودي بتكون عبارة عن فيلا بيمتلكها اتنين من الأشخاص بس لكل واحد منهم مدخل خاص بيه وجنينة من ثلاث جوانب وبيكون ليها بوابة خاصة.

الفلل: ودي عبارة عن وحدة سكنية مستقلة وبيكون ليها بوابة خاصة بيها وسور وجنينة مستقلة وحراسة. وغالبا بيكون فيها حمام سباحة. وعادة بتتكون الفيلا من طابقين أو أكتر.

لو بتفكر تسكن في بنتهاوس أو دوبلكس أو تاون هاوس مثلا يبقى المجمعات السكنية هتكون الاختيار الأفضل ليك وده لأنها بتتميز بالهدوء والخصوصية والخدمات والمساحات الخضراء، بالإضافة لتنوع مساحات وأسعار والوحدات السكنية فيها. فممكن تختار الوحدة السكنية اللي انت عايزها بالسعر اللي يناسبك.

  1.     موقع الشقة: اختيار مكان الشقة بيرجع لترتيب أولوياتك. يعني مثلا:
  • لو عايز تسكن في مكان هادي بعيد عن الدوشة والزحمة يبقى انت لازم تدور في المدن الجديدة زي: التجمع والشروق ومدينتي و6 أكتوبر و العبور؛ لأن المدن دي كلها موجودة على حدود المحافظة يعني الروقان والهدوء.
  • لو عاوز تسكن برده في مكان هادي لكن يكون في نفس الوقت قريب من وسط البلد، يبقى المجمعات السكنية الموجودة على الطريق الدائري بالقرب من زهراء المعادي والمقطم زي كمبوند أشجار دارنا والبارون وسما القاهرة هي أفضل اختيار بالنسبة لك.
  • أما بقى، لو انت بتدور على مكان يكون فيه خدمات وقريب من أكتر المناطق الحيوية اللي فيها أغلب مقرات الشركات والبنوك يبقى المدن الجديدة زي: القاهرة الجديدة والشيخ زايد و 6 أكتوبر هي الحل! وبكده شغلك هيبقى جنب بيتك!.
  • و لو نفسك تسكن في مناطق وسط البلد عشان تكون قريب من أشهر المولات والمطاعم والأماكن الترفيهية، ممكن تكون مدينة نصر أو مصر الجديدة اختيار مناسب ليك عشان هيكون حواليك كل الخدمات اللي بتدور عليها ومش هتحتاج عربية.
  • أما لو أنت عاوز تسكن في مكان هادي وفي نفس الوقت آمان يبقى المجمعات السكنية هي الاختيار الأفضل ليك؛ لأنها بتكون محاطة بسور وفيها بوابات وحراسة طول الوقت.
  1.  الميزانية:

–          لو ميزانيتك صغيرة (في حدود 500,000 جنيه او أقل شوية) و عايز تسكن في مكان كويس وهادي، ممكن تختار شقة في العبور أو الشروق أو حدائق الأهرام أو كمبوند البارون على الدائري أو أي مجمع سكني في المعادي لأن كمبوندات المعادي أسعارها معقولة بالنسبة لباقي الكمبوندات في التجمع الخامس و6 أكتوبر

– لو ميزانيتك في حدود (700,000 – 900,000 جنيه) وعايز تسكن في مكان كويس وراقي، ممكن تختار شقة في 6 أكتوبر أو المقطم أو مدينة نصر أو حي النرجس مثلا في التجمع الخامس.

–     لو ميزانيتك كبيرة (1000,000 فأكثر) ونفسك تسكن في مكان هادي وفيه كل الخدمات اللي ممكن عيلتك تحتاجها، يبقى ويست تاون وبيفرلي هيلز وكازا هيكونوا من أكتر المجمعات السكنية اللي تناسبك في الشيخ زايد وليك فيو وايست تاون هيكونوا من أحسن الاختيارات ليك في التجمع الخامس.

  1.    الخدمات: وانت بتفكر تشتري شقة لازم تفكر في الخدمات الموجودة في المنطقة اللي هتسكن فيها زي السوبر ماركت والمساجد والجامعات والمدارس والمستشفيات.
  2.     المساحات:
  • لو انت لسة متجوز ومش ناوي انت ومراتك تخلفوا دلوقتي، ممكن تسكن في شقة مساحتها تتراوح من 60 الى 90 متر مربع. هتكون مناسبة ليك انت وهي بس وهيكون فيها أوضة نوم وحمام ومطبخ وصالة.
  • لو عيلتك صغيرة وبتتكون من 3 أفراد مثلا، ممكن تسكن في شقة مساحتها 100 متر أو 130 متر مربع.
  • لو ميزانيتك كبيرة ومن دلوقتي عايز تجيب شقة كبيرة تكون مريحة ليك ولاولادك في المستقبل ممكن تسكن في شقة 160 -200 متر مربع.
  1.     التشطيبات:
  • الجزء دة بيكون مرتبط بالناحية المادية جدا. ليه؟ لأن الشقة المتشطبة تشطيب سوبر لوكس أكيد هتكون أغلى بكتير من الشقة اللي على الطوب الأحمر. في ناس بتحب تشتري شقة على الطوب الأحمر عشان هتوفر من عليهم فلوس كتير وعشان برضه بيحبوا يشطبوا الشقة على مزاجهم. وناس تانية ممكن تحب تريح دماغها وتدفع فلوس أكتر شوية بس ياخدوا شقة جاهزة ومتشطبة حلو. فالموضوع دة بيكون راجع لاختيارك انت.
  • زي ما قلنا قبل كده،  وانت بتدور على شقة، لازم تفكر في تكلفة تشطيبها لأن ده هيوفر عليك حاجات كتير ويسهل عليك انك تحدد مساحة الشقة اللي انت عايز تشتريها. يعني مثلا تكلفة تشطيب شقة 100 متر بتبدأ من 50 ألف جنيه وممكن توصل ل 100 الف جنيه حسب الخامات المستخدمة. فعشان كدة مهم أوي انك تختار مساحة مناسبة للميزانية بتاعتك وصنايعية كويسين لأنهم ممكن يقللوا التكلفة.
  1.     العفش:  في البداية حدد الأولويات عشان تعرف ايه اللي لازم يتجاب في أسرع وقت وايه اللي ممكن تستنى عليه. خليك عملى فى اختيار العفش وانزل بص في أكتر من معرض وأكتر من محل زي مثلًا: مول دمياط ومفكو حلوان عشان تعرف تختار حاجات كويسة وبأسعار معقولة. وفي نفس الوقت بص أونلاين على العفش عشان تعرف تقارن وتختار الأنسب ليك من ناحية الأذواق والأسعار.

وأخيرا، لو عايز تعرف أي معلومات تخص العقارات من حيث المناطق والمساحات والأسعار ممكن تدخل على موقع بروبرتي فايندر وهتلاقي عليه كل عقارات للبيع في مختلف مناطق مصر وكمان معلومات عن أرقى المناطق والمجمعات السكنية في القاهرة واسكندرية وفي كل المحافظات. مش كدة وبس، موقع بروبرتي فايندر برضه هتلاقي عليه قسم خاص بكل حاجة ليها علاقة بالعقارات سواء الديكورات أو أخبار السوق العقاري وكمان دليل كامل للأحياء السكنية المختلفة وأحدث المجمعات السكنية.

Comments

comments

عن SupeRagel

شاهد أيضاً

القهوة

إزاي تقدر توفَّق بين مراتك وقعدتك على القهوة ؟

المعادلة طبعًا صعبة لعشاق قعدة القهوة لكن طالما دبست نفسك في جوازة وبيت يبقى لازم …