الرئيسية / BuzzRamet / مناسبات لازم تنقطّ فيها صحابك

مناسبات لازم تنقطّ فيها صحابك

كتير أوي الواحد يروح مناسبة، ويلاقي الناس اللي حوليه بتطلع فلوس وبتديها لصاحب المناسبة دي، ويسأل انتوا بتدوه فلوس ليه يا اخوانا. فيتقالك إنها نُقطة، وعشان الرجالة دايما مش بتركز في التفاصيل دي وبتعرفها مع الوقت بعد مواقف محرجة كتير، احنا هنقولك أبرز المناسبات اللي لازم تجهز فيها نُقطةلصاحبك أو قريبك.

  1. الحِنة

في رجالة بيعملوا حِنة قبل الفرح بكام يوم، ودي أصلًا بتتعمل عشان اللي حابب ينقط العريس ينقطه في الليلة دي، ودي بقى على حسب مقدرتك يعني أو غلاوة الشخص أو انت شايف هو محتاج ولا لا في التوقيت دا، بس متقلش عن 100 جنيه في أسوء الظروف. أو متروحش بقى.

  1. الصباحية

أغلب العرسان بيبقوا صرفوا اللي وراهم واللي قدامهم في موضوع الجواز وبيبقى على الحديدة، وفيه ناس بتقعد في بيوتها مبتتحركش لانه معهوش فلوس، عشان كدا نُقطة الصباحية دي مهمة جدًا، بتبقى منُقذة للعريس وممكن يتجمعله مبلغ محترم يسافر بيه أو يخرج مع مراته أو تقضيه كام يوم الإجازة اللي هو واخدهم.

  1. السبوع

لما صاحبك ربنا يرزقه بمولود، بيتلخم شوية في الموضوع، بس بعد فترة بيعمل السبوعوبيعزم كل القرايب والأحباب والصُحاب، وانت رايح بقى يا برنس خلي معاك مبلغ محترم عشان تنقطبيه المولود، بتروح زي الشاطر كدا تبوس الطفل وتحط الفلوس في ايده الصغيره أو على صدره، أو ممكن تدي الفلوس لوالده على طول، وفيه ناس بتجيب هدية أو دهب لو المولود بنت، زي ما تحب بقى، بس الفلوس دايمًا أفضل الحلول. أو تكون هدية مميزة جدا متتنسيش.

  1. الأزمات (الحوادث والعمليات)

الناس بتحتاج دايمًا فلوس في وقت الأزمات، لما بيحصل مرض أو دخول مستشفى أو بيكون فيه عملية، الحاجات دي بيتصرف عليها جامد، عشان كدا الدعم المادي بيكون مطلوب في التوقيت دا، فلما بتكون رايح لحد مريض عمل حادثة لاقدر الله ولا كان في عملية، لازم تنقطه، لو كانت حالته لا تسمح بتديها لحد من ولاده أو زوجته أو حد من أخواته.

Comments

comments

عن El-Omda

El-Omda
العمدة..صديقنا الصدوق اللي بيكتب في كل المواضيع اللي تهمنا

شاهد أيضاً

WE

إزاي تشتري خط WE في 4 خطوات

عشان تشترى خط WE لازم تعمل اللى هقولك عليه يا كبير و الموضوع سهل وبسيط …

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *