الرئيسية / الشياكة والاناقة / عشر حاجات لازم تبقى في دولابك

عشر حاجات لازم تبقى في دولابك

عشان تصحى كل يوم، تلاقي هدوم مناسبة تروح بيها الشغل أو خروجة مفاجئة، أو سفرية حلوة، لازم دولابك يبقى فيه ملابس معينة.. هنديك فكرة عنها حالًا:

  1. شراب وحزام

مينفعش تلبس نفس الشراب مرتين ورا بعض، خلي عندك 7 شرابات بعدد أيام الأسبوع، اللون الأسود والبني من الألوان الأساسية.

ومهم يكون عندك حزامين واحد أسود والتاني بني، اللونين دول هيليقوا على أي بنطلون مهما كان شكله أو نوعه.

  1. بناطيل

مهم يكون عندك بنطلون جينز أزرق اختار الشكل اللي يناسبك بس مهم يكون مريح وجودته كويسة، وبنطلون كلاسيك أسود أو كحلي هيكون مناسب في أي خروجة رسمية.

واعمل حسابك على بنطلون قطن تشينوهتقدر تلبسه في أي وقت هيكون حلو لو اختارته بيج فاتح مثلا هيكون لطيف جدا.

  1. قمصان

القمصان من أهم القطع اللي لازم تكون في دولابك لأنها مناسبة لأي وقت ولأي خروجة. مهم يكون عندك 3 قمصان على الأقل 3 درجات مختلفة، وأهم لون هو الأبيض، وكمان قميص أزرق هيليق جدًا على البنطلون البيج الفاتح اللي قولنا عليه.

  1. تي شيرت

مفيش راجل مش بيحب التي شرتات بتكون سهلة في اللبس ومريحة خلي عندك تيشرت أسود دا أساسي، ونوعّ بقى بعد كدا وممكن تجيب التيشرتات المطبوعة لو بتحبها.

  1. بالطو أو جاكيت جلد

في أيام البرد هتحتاج يكون عندك بالطو أو جاكيت، اهتم إنك تجيب واحد فيهم على الأقل قبل دخول الشتا علشان الحوسة والمطر.

  1. بدلة

حوشّ مبلغ كويس واشتري بدلة شكلها لطيف ومريحة وجودتها تكون كويسة، لأن مهما هتلبس فيها هتفضل محافظه على رونقها. ممكن كل مرة تلبس قميص مختلف معاها.

  1. جزمة

في ناس كتير بتهتم إنها تشتري أكتر من جزمة بسعر قليل، بس دا مش صح ومش تفكير اقتصادي خالص، ممكن تشتري عدد أقل ويكون سعرهم أغلى بس جودتهم بتكون أفضل وبيستحملوا أكتر، وخلي عندك جزمة كلاسيك، كوتشي للشغل، وكوتشي للفسح والخروجات.

  1. المايوه

طبعًا أساسي يا معلم.. اعمل حسابك على مايوه يكون لطيف وروش علشان لو ضربت في دماغك انت وصحابك تسافروا يومين تكون جاهز ومستعد.

  1. الشنطة

لازم يكون عندك شنطة سفر صغيرة، وشنطة كتف علشان لو احتاجتها في شغل أو حاجة.

  1. الكماليات

ساعة ونضارة وبرفيوم، شياكتك هتكمل بالحاجات دي.. اهتم بيهم جدًا.

Comments

comments

عن El-Omda

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *