الرئيسية / الاكل / اكلات – اربع اكلات تقدر تعملهم في البيت بسهولة
اكلات

اكلات – اربع اكلات تقدر تعملهم في البيت بسهولة

سواء عازب وعايش لوحدك، أو حابب تساعد مراتك في عمايل البيت، وعايز تطبخ الأكل بنفسك.. عمايل الأكل مش حاجة صعبة، بالعكس بمكونات بسيطة تقدر تعمل أكل صحي ومفيد ولذيذ.
  1. التونة:

اوعى تستقل بعلبة التونة، تقدر تسوي بيها الهوايل على فكرة، لأنها تمشي مع أي حاجة حاجة، مع مكرونة شغال مع سلطة مش هتقول لاء مع نفسها كدا حلو برضو، وأسهل وصفة بقى كالأتي:

جيب علبة تونة قطع وصفيها كويس من الزيت، قطع عليها طماطم وابشر جزرة، وخرط بصلة قطع صغيرة، حبة ملح وفلفل اسمر، عصرة ليمون، ثم حبة طيحنة وزيت من عندك واخلط دا كله مع بعضه يا معلم مع رغفين عيش بلدي وعيش.

جرب الخلطة ديه مع حبة بطاطس مقرمشين مع عيش فينو وادعيلي.. طبعًا الطحينة واللمون والبصل بيعملوا شغل حلو.

  1. مكرونة اسباجتي بالجبة الرومي:

المكرونة عامل مشترك بين أكلات كتير جدًا، طريقتها سهلة وتقدر تأكلها مع أي حاجة وفي أي وقت.

تجيب حلة وتحط فيها حوالي 2 لتر ماية، وتسيبها على النار لحد ما تغلي، بعدها تحط معلقة ملح صغيرة ونقطتين زيت وبعد كدا تحط كيس المكرونة وتقلب كل كام دقيقة كدا علشان متعجنش، بعد 12 دقيقة هتكون المكرونة جهزت، هتصفي المكرونة من الماية، وبس كدا.

هتقدمها في الطبق وعليها رشة محترمة من الجبنة الرومي المبشورة وزود بلاش تبِخل على نفسك، مع حبة بقدونس كمان حكاية.

  1. الكبدة:

ديه بقى حاجة برنسيسة في نفسها ليه بقى لأنها بتستوي في دقايق، سواء كانت مقلية أو إسكندراني.. ولازم تعرف إن سحر الكبدة في الخطلة اللي بتتبل فيها.

خلطة الكبدة المقلية:

دُق كام فص توم قول 7 فصوص مثلاً، حبيتين فلفل اخضر، ملح وفلفل اسمر وكمون، عصير ليمون. اخلط كل دا بعضه وتَبِلّ بيه شرايح الكبدة بعد ما تغسلها. ثم سيب الكبدة في الخليط دا نص ساعة، طلع بعدها شرايح الكبدة اللي تبلتها وحطها في دقيق خليها تتغطى بالدقيق كويس.

جهز طاسة بقى يا معلم فيها زيت وخليه يسخن كويس وبعد كدا حط الكبده تتقلي، اوعى تسيبها على النار كتير لأحسن تنشف منك، تتقلب ع النار لمدة خمس دقايق كفاية جدًا.

  1. الحواوشي:

من كتر ما طعم الحواوشي حلو الناس بتفتكر إن عمايله صعبة، إطلاقًا واسمع مني، مفيش أي افتكاسات في الحواوشي خالص وعن تجربة، سر الحواوشي في البصل والفلفل الأخضر:

الحقيقة عايز أقول إني حسيت بمعاناة الست المصرية من كمية البصل اللي خرطها بس التجربة تستحق لأن البصل يحب الحواوشي، والحواوشي يحب البصلمعروفة يعني، خرط خمس بصلات مثلاً مع نص كيلو لحمة مفرومة وقطع خمس حبات فلفل أخضر وحبة ملح وفلفل أسمر وشطة لو تحب وبس كدا هي ديه المكونات.

هتجيب العيش البلدي و هتفرد جواه طبقة من اللحمة وتحط العيش في صينية وحطها في الفرن تلت ساعة وهتلاقي كام رغيف حواوشي مقرمشين. ممكن تأكل معاه بطاطس محمرة أو طبق سلطة، زي ما تحب.
لو كنت من عشاق الجبنة تقدر تضيف شريحة جبنة شيدر فوق اللحمة بعد ما تفردها في رغيف العيش البلدي.

 

Comments

comments

عن El-Omda

El-Omda
العمدة..صديقنا الصدوق اللي بيكتب في كل المواضيع اللي تهمنا

شاهد أيضاً

اكلات

اكلات – بطلها الجزر – انسى السلطة والمربى

الشتاء موسم الجزر وبعيدا عن مربى الجزر وعصير البرتقال بالجزر أو حتى السلاطة التي تعدها …

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *