الرئيسية / العلاقات / إزاي تساعد مراتك في البيت؟

إزاي تساعد مراتك في البيت؟

وصلت لمرحلة الوحش وربنا كرمك واتجوزت يا معلم، كدا لازم تجهز نفسك لحياة جديدة، شركة بينك ومراتك، ولازم يبقى فيه تعاون وتقسيم مسؤوليات وتظبيط حركات، ومهم جدًا تساعد مراتك في البيت على قد ما تقدر.. إزاي بقى؟ تعالى لما نقولك.

  1. التزم بالتعليمات

أي ست مصرية أصلية، بعد الجواز مباشرة هتلاقيها بتحط قواعد للبيت كدا وتعليمات لازم تمشي عليها، من أهمها مترميش الشرابات على الأرض، حُط هدومك في الدولاب، متقعدليش عريان في الشقة (هتكون لابس طبعا حاجة بس مش هتبقى مقنعة ليها).. فبننصحك انك تتبع التعليمات دي بحاذفيرها لأنك كدا هتبقى بتساعدها.

  1. متدخلش المطبخ

لوكنت هتبهدلها الدنيا، وهتكركبلها المطبخ، وهتكسرلها الأطباق، يبقى ابعد عن المطبخ تماما واقطع علاقتك بيه.. اه دا كدا هتبقى بتساعدها جدًا، ولو عملت العكس هتعتبرك مخرب.

  1. العكس

أيون، لو بتعرف تطبخ ونفسك حلو وبرنس كدا وعندك خبرة عظيمة في الموضوع، ادخل ساعدها، أو خلي يومك عليك في الطبيخ، أو فاجئها مرة إنك اللي هتعمل الغدا أو العشا ليها، هتبقى عملت أكبر مساعدة في الدنيا.

  1. السُفرة

تبقى برنس أوي في نفسك ومحترم لو قومت بعد ما خلصتوا أكل وشيلت معاها السفرة وساعدتها في كدا. بتبقى حركة جنتله منك وفيها مساواة كدا لأنكوا شركا في البيت.

  1. المواعين

أه المواعين يا برنجي.. دي من أكتر الأعمال اللي بتكرها الستات في الدنيا، لو قسمت بينك وبينها الموضوع دا مرة ومرة أو انت خدت مرتين في الأسبوع الموضوع هيبقى لطيف جدًا بشكل مش هتتخيله.

  1. كيس الزبالة

إنك تاخد معاك كيس الزبالة وأنت طالع من البيت عشان ترميه، هي صعب جدًا تمسكه ومعاها عيال والدنيا لخمة، فشيل مسؤوليتك بقى وخُده معاك.

  1. الكسل

إنك متكسلش لو طلبت منك حاجات للبيت، سواء أكل أو أدوات كهربائية أو تصليح حاجة بايظة، أو تكلم بتوع الغاز يجوا يشوف الدنيا لو فيها مشاكل.

Comments

comments

عن El-Omda

El-Omda
العمدة..صديقنا الصدوق اللي بيكتب في كل المواضيع اللي تهمنا

شاهد أيضاً

“روتين يومي لعلاقة حميمية بدون ملل .. “اهتم بالقبلة اليومية

هل قبلت زوجتك اليوم ؟ قد تنسى الأمر مع سنوات الزواج الطويلة ولكن خبراء العلاقات …

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *