الرئيسية / هتجوز / إزاي تختار شقة الزوجية

إزاي تختار شقة الزوجية

ربنا كرمك وخطبتك وعايز تجهز نفسك وتدخل دنيا، أكتر سؤال هيتقالك من مصر كلها وأولهم أهل العروسة، هو عندك شقة ولا لا؟ عشان كدا لازم تكون جاهز بالشقة أو معاك فلوسها وبتدور عليها.. وعشان تختار شقة كويسة ومريحة وتساعدك على الاستقرار مش العكس، اسمع مننا النصايح دي وجرب وشوف.

  1. المكان

حاول دايمًا يكون اختيارك في مكان حيوي، يعني بلاش تروح مكان لسه جديد مفهوش خدمات. مهم تركز إنه يكون فيه مواصلات كويسة وإنه قريب من الأسرة خاصة أهل العروسة لأنهم هيفدوك جدًا لما تبقى حامل وفي الولادة، ولما يبقى عندك ولاد.

  1. الخدمات

مهم شقتك تبقى قريبة من الخدمات اللي هي الأسواق والمدارس والمستشفيات، دا هينقذك كتير في حالات الطواريء ومشوار الطبيخ بتاع كل يوم ميكونش مرهق وولادك يبقوا بيدرسوا حوليك فيما بعد.

  1. المساحة

أقل حاجة تبقى 100 متر، عشان تعرف تعمل شقتك بشكل كويس وتحس إنها مكان واسع مش ضيق، وتنفذ بسهولة أحلامك عن شقة الزوجية، وتلاقي مكان لعفشك.

  1. نص تشطيب

يُفضل تجيب شقة على الطوب الأحمر، عشان تقدر تعمل كل حاجة براحتك بداية من كهربة البيت ثم المحارة للدهان لنوع السيراميك. لكن لو جبت شقة متشطبة هيطلع عينك عشان تعمل التعديلات اللي انت عايزها. وممكن تدفع فلوس اكتر.

  1. الدور الأخير

فيه ناس بتقول إنه بلاش تأخد شقة في الدور الأخير لأنها بتبقى في مهب الريح، في الصيف مولعة وفي الشتا بتبقى برد علقم، دا غير إنها لو مفيهاش اسانسير الموضوع هيبقى مرهق جدًا في الطلوع أو النزول.. أو لو الاسانسير اتعطل هتبقى بهدلة.

  1. السباكة

مهم جدًا لما تختار شقتك إنك تتأكد إن السباكة سليمة ومفيهاش مشاكل، عشان هتبقى حوسة لو وضبت وفي الأخر اكتشفت إن الحمام بيسرب مايه ولا هتأثر على الحيطان.

  1. المخالفات

بعد ما تختار شقتك اتاكد طبعًا من صاحب البيت إن العقار مش مخالف وإن كل الأوراق سليمة، وتروح مشوار برده للحي احتياجي عشان تتأكد من الموضوع. لأن الحكاية دي مفيهاش هزار انت دافع شقى عمرك في الشقة.

Comments

comments

عن El-Omda

El-Omda
العمدة..صديقنا الصدوق اللي بيكتب في كل المواضيع اللي تهمنا

شاهد أيضاً

نصائح مهمة لتشطيب شقة الزواج

أي حد بياخد خطوة الجواز، وربنا يكرمه ويجيب شقة، بيبقى عنده مارثون كبير وهو تشطيب …

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

إشترك معانا يوصلك كل خبر جديد