الرئيسية / العلاقات / إزاي تجهز نفسك وإنت رايح تتقدم لحبيبتك

إزاي تجهز نفسك وإنت رايح تتقدم لحبيبتك

من أهم الأيام في حياتك هو اليوم اللي هتروح تقابل في حماك وحماتك وتقول الجملة الشهيرة “يا عمي أنا جاي أطلب إيد بنتك” علشان كدا مهم تستعد كويس لليوم دا لأنه هيسيب انطباع هيفضل يطاردك طول عمرك، وعلشان اليوم دا يطلع بشكل حلو  هأقولك تعمل إيه.

  1. انت مش لوحدك في أرض المعركة، في طرف معاك وهي شريكة حياتك ودورها إنها تهيأ الأجواء ليك وتسهل المواضيع شوية، اتفق معاها إنها تتكلم عنك قدامهم حلو تحكي عن بطولاتك وأمجادك خصوصا مع مامتها، وتخليهم يحسوا إنهم هيقبلوا بطل مغوار خارج من حكايات وأساطير الف ليلة وليلة.. بالحُب بقى مش أفورة.
  2. بعد ما تتكلم عنك حلو ويعرفوا إن في حد قرر يضحي بحياته ويرتبط ببنتهم، خليها تقولهم إنك خلاص ناوي تيجي البيت وتتقدم، وخد منها رقم باباها واتصل بيه، إعرف منها هو بيصحى من النوم امتى بالظبط وكلمه بعدها عالطول علشان هيكون مدروخ ومش هيركز أوي في كلامك، علشان لو لغبطت في الكلام ولا حاجة.
  3. حدد ميعاد لا يكون وقت غدا ولا وقت عشا يعني الساعة 6 ميعاد مناسب جدًا لأحسن يفتكروا انك رايح تأكل عندهم ولا حاجة، أو يقولوا معندوش دم هو دا وقت يجي فيه.
  4. نيجي بقى على الحاجات المهمة هتلبس إيه وهتأخد إيه في ايدك وانت رايح:

أولًا اللبس.. بلاش وحياة دقنك تلبس تيشرت ولا سويت شريت انت مش رايح تتفرج على ماتش، طلع البدلة والبسها ولو مكنش متاح بدلة يبقى قميص شيك وبنطلون قماش يكون أفضل، ومتنساش رشة برفيوم.

ثانيًا بقى خُد معاك شيكولاتة تكون نضيفة أو تورتة مثلاً، أو بوكيه ورد حلو ورقيق جدًا ومعاه شيكولاتة برضو، أفضل حاجة انك تجيب هدية واحدة بس تكون من مكان معروف.

  1. لما توصل لليوم الموعود روح لوحدك بلاش تأخد حد معاك، وضب الدنيا قبل ما أهلك يظهروا في الصورة.
  2. اوصل في ميعادك بالظبط بلاش تتاخر لأحسن اللعنة هتفضل تطاردتك وتتذل بيه قدام عيالك وأحفادك.
  3. انت مش داخل امتحان بلاش تهز رجيلك بلاش تعمل أي حاجة تبين إنك قلقان، اتكلم عن نفسك وقول كل الانجازات اللي حققتها والحاجات اللي ناوي تعملها.
  4. احكي عن خطتك للجواز بس بلاش تقول كلام إنت عارف انك مش هتقدر تعمله، خليك محدد وواضح.
  5. هيقدمولك عصير اشربه، وبعدها شاي وجاتوه تاكل الجاتوه ولا يهمك.. اوعى متأكلش هيزعلوا منك.
  6. انهي الزيارة في اللحظ اللي هتحس فيها إنهم خلاص بقوا معجبين بيك، سيبلهم عنوانك واتفق معاهم على ميعاد هيردوا فيه عليك.
  7. متقلقش لما هتمشي بعدها بدقايق حبيبتك هتقولك وافقوا خلاص، حتى لو قالولك هنرد عليك بعد اسبوع ديه!

Comments

comments

عن El-Omda

El-Omda
العمدة..صديقنا الصدوق اللي بيكتب في كل المواضيع اللي تهمنا

شاهد أيضاً

هل يجب أن تتوقف عن العلاقة الحميمة أثناء الحمل ؟

ما بين دلال زوجتك أو إصابتها بالفتور الجنسي أحيانا بسبب الحمل، أو خوفها الزائد علي …

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *