الرئيسية / هتجوز / إزاي تجهز ليوم خطوبتك في 5 خطوات

إزاي تجهز ليوم خطوبتك في 5 خطوات

بُص يا برنس، اليوم دا بييجي بعد معاناة كبيرة، فلازم تركز في شوية خطوات كدا تعملها عشان اليوم يطلع في أحسن صورة.. وركز إنك تنبسط في اليوم لأنه مميز وهيفضل في ذاكرتك إنت وحيبتك والقرايب والصحاب.
القاعة
اختار قاعة مناسبة لفلوسك والعدد اللي حابب يحضر، كل ما العدد يكون ملموم كل ما الدنيا تبقى منظمة وتطلع بشكل كويس.. اختار قاعة تكون في مكان سهل الوصول إليه، ويبقى فيه مساحة في محيط القاعة ينفع المعازيم يطلعوا يقعدوا فيها عشان لو اتزحمت.
البدلة
روح قبل الخطوبة بوقت كافي، بُص في أكتر من مكان، بلاش تروح في أخر لحظة عشان هتلوص وهتضطر تلبس حاجة مش عجباك أوي ودا مينفعش.. اختار لون يكون رمادي أو أزرق بلاش افتكاسات كبيرة، وأهم حاجة البدلة تكون مريحة. القميص يبقى قُطن والجزمة تبقى فخمة، وخليك في البيبون أشيك كتير من الكرافتات.
المعازيم
حاول تختار المعازيم بعناية، متتكسفش، مش هتكون مبسوط لو حد حضر وانت مش بتحبه.. اختار الأقارب المميزين والأصحاب المقربين. ليك الحق في إنك ترفض اصطحاب الأطفال لأنهم أكتر حاجة هتبوظ الدنيا وهتفرهدك إنت والعروسة ويقعدوا على الكوشة يا معلم وهتبقى حوسة.
الدي جي
في الأغلب المسؤول عن الدي جي دا بيبقى صعب المراس، ومعتقد إنه لازم الفرح يمشي على مزاجه، مفيش الكلام دا يا معلم، جهز أغاني فرحك بالترتيب على فلاشة، وروح رتب معاه من قبلها، ورتب مع واحد صاحبك يلزقله ويتأكد إنه ماشي بالترتيب اللي انت عايزه. وخليه يرفض اي اقتراحات من المعازيم. متنساش تشهيص نفسك بكام غنوة تولع الفرح.
الصُحاب
وزع أي حاجة مفروض تحصل في قاعة الفرح على صحابك القريبين، زي ما قولنا واحد مع الدي جي، واحد يتابع المعازيم من أهلك يشوف لو محتاجين حاجة، واحد برنس وحلال العُقد يتابع لو حصل اي خناق ولا أي مشكلة يتدخل ويحلها فورًا، وواحد وراك بمناديل عشان هتعرف من الرقص، ألخ بقى.

Comments

comments

شاهد أيضاً

إزاي تختار قاعة فرحك

كل ما بيقرب فرحك كل ما هتلاقي فلوسك بتخلص وبتتسرسب من جيوبك، وعقبال ما بيجي …

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *